गुवाहाटी, 27 आगस्टः गिबि मन्थ्रि सर्बानन्द सनवालनि मासि सामलायनानै दैदेन्नाय राइज्योनि केबिनेट मन्थ्रिफोरनि मोनसे जथुमायाव माखासे गोनां थांखिफोरखौ लानाय जादों होन्नानै सुलुंनिफ्राय मिथिनो मोन्दों। दिनै बृहस्पतिबारखालि गुवाहाटीनि जनता भवनआव खुंनाय जर'खा केबिनेट मन्थ्रिफोनि जथुमायाव सावरायनायनि गेजेरजों थांखि लानायनि बागै मन्थ्रि चन्द्रमहन पातवारिआ फोरमायनाय बादिब्ला बे मेलयाव मंगलदैयाव 100 बिघा हायाव 900 कौटि रां बाहायनानै स्किल इउनिभार्सिटि गायसन्नायनि थाखाय आसाम स्किल डेभेलपमेन्ट इउनिभार्सिटि बिलखौ गनायथि होयो।
बे मेलनि गेजेरजोंनो राइज्यो सरकारनि III आरो IV ग्रेड साख्रिनि थाखाय बैसोनि सम सिमाखौ सिगांनि 38 निफ्राय 2 बोसोर बांहोनानै 40 बोसोरसिम खालामनो थांखि लानाय जायो। बेनि अनगायैबो मेलयाव आसाम हेरिटेस प्रटेक्सन आरो प्रेजार्भेसन बिलखौ गनायथि होयो। लोगोसे डिउटि होनाय समाव कभिड-19 जों सन्देरजानानै जिउ खहा जानाय गासै केजुयेल मावसुमा, हमगार्ड आरो खौरांगिरिफोरनो 50 लाख रांनि इन्सुरेन्स जगायथिनानै होनो थांखि लायो।
1957 माइथायाव जागायनाय लुफुंथाय धनसिरि दै जगाय बिथांखिखौ आबुं खालामनायनि थाखाय नाबार्डनिफ्राय 116 कौटि रां लानायनि थांखि दैखाङो। बेबायदिनो अरुनदय बिथांखिनि गेजेरजों बोसोराव 2 लाख रांनि खमसिन आरजिग्रा नख'रफोरनो 830 रांखान्थि अन्सुंथाय होनायनि सायावबो थि थांखि लानाय जायो।
