कक्राझार, 8 अक्ट'बरः बर' हारिनि थाखाय 7 अक्ट'बर सानआ गुबुन मोनसे जारिमिनारि सान जाबावदों। मानोना बुधबारखालि आसाम केबिनेटआ बि टि आरनि बाइजोयाव थानाय बर' फिसाफोरनि फारफ्रोम बिथिंनि जौगाथाय, रैखाथि आरो थामोन्थानि थाखाय बर'-कसारि वेलफेयार अटन'मास काउन्सिलनि बिलखौ गनायथि होबाय। बेजों लोगोसेनो गोलाव समनिफ्राय बर' हारिया हास्थायबोबाय थानाय गुबुन मोनसे सिमाङाबो जाफुंबाय। बेनो जाबाय बर' रावआ आसामनि लोगो मावख'यारि राव महरै गनायथि जानाय।
गोजौयाव मख'बोनाय बे मोन्नै बर'फोरनि गेदेर सिमां एबा हास्थायनाया मोगथां महर मोन्नायाव बि टि आरजों लोगोसे दुलाराय आसामनि गासै बर' फिसाफोरनि गेजेरावनो मोनसे रंजानाय आरो गोजोननि दोहौ सोमजिखांदों। बि टि आर गोरोबथानि दफाबादियै बे मोन्नै गेदेर थांखिखौ आसाम केबिनेटआ बुधबारखालि गनायथि होनायखौ गोबां बर' हारिनि आफाद-गौथुमफोरा आसाम सरकारनिसिम साबायख'र जासिदों । बि टि आर गोरोबथानि 5.1 दफा बादियै बि के डब्लिउ ए सि दाफुंनाय आरो 6.2 दफा बादियै बर' रावखौ आसामनि लोगो मावख'यारि राव महरै गनायथि होनायनि थाखाय दुलाराय बर' फरायसा आफाद, इउनाइटेड बड' पिपुल्स अर्गेनाइजेसन (इउबिपिअ') आरो इउनाइटेड पिपुल्स पार्टि लिबारेल एबा इउपिपिएल राजखान्थि दोलोया आसाम सरकारनिसिम साबायख'र जासिहरदों। इउपिपिएलनि आफादगिरि एबा एबसुनि बारग' आफादगिरि प्रमद बर'आ आसाम केबिनेटयाव बि के डब्लिउ ए सिखौ मावफुंनो गनायथि होनायखौ बरायनायजों लोगोसे राइज्यो सरकारनिसिम साबायख'र जासियो।
एरैहाय इउबिपिअनि आफादगिरि मिहिनीश्वर बसुमतारीआबो बर'फोरनि थाखाय बे गेदेर आयदाखौ मावफुंनो गनायथि होनायनि थाखाय राइज्यो सरकारनिसिम साबायख'र जासियो। बेजों लोगोसेनो बि के डब्लिउ ए सि दाफुंनायनि गेजेरजों बि टि आरनि बाइजोयाव थानाय गासै बर' फिसाफोरा जौगानाय, रैखाथि आरो थामोन्थाजों लोगोसे राजखान्थियारि, रांखान्थियारि आरो समाजयारि मोन्थायफोरखौ आबुङै मोन्नो हासिगोन होन्नानै इउबिपिअनि आफादगिरि मिहिनीश्वर बसुमतारीआ मिजिंथिनाय फोरमायदों।
