गुवाहाटी, 10 सेप्तेम्बरः दिल्ली सरकार खुंथायाव थानाय आम आदमि पार्टी सुंदयै आपआ फैगौ 2021 नि आसाम बिधान सभा बिसायख'थियाव गासै 126 बियाबफोराव बिजाथि फसंगोन। दासान्दि आप हान्जाया आसामनि मोनफ्रोमबो जिल्लायावनो हान्जाखौ गोख्रों खालामनायनि थाखाय साखा-फारा जादों। आसामनि बिसायख'थिनि थाखाय आपजों थिसनजानाय मिरु दैदेनगिरि राजेस शर्मानि दैदेन्नायाव दासान्दि हान्जाखौ गोख्रों खालामनाय हाबाफारिया सोलिबाय थादों।
हान्जाया आसामनि मोन 84 बियाबआव बिजाथि फसंगोननि जोबथा फारिलाइ खालामनानै गुबुन माखासे बियाबनि थाखायबो थांखि लानायखौ मिथिहोदों। थांनाय 8 सेप्तेम्बरखालि नारायणपुर प्रेस क्लाबाव खुंनाय मोनसे खौरागिरि मेलआव आसामनि बिबान मोन्नाय मिरु दैदेनगिरि राजेस शर्माया बे बाथ्राखौ फोरमायदों । फैगौ बिसायख 'थियाव आसामनि गुबुन गुबुन जिल्लानि राइजो-राजानिफ्राय आबुं हेफाजाब मोनगोनखौ आप दैदेनगिरिया दाबि खालामनायजों लोगोसे बिजेपि आरो कंग्रेस हान्जाखौ गेनाखान्थिजों लोब्बा थानाय हान्जा होन्नानै आप सरकार फैयोब्ला आसाम गोरोबथाखौ फारि-फारियै मावफुंगोन होननानै दैदेनगिरिया बाथ्रा होयो।
