कलकाटा, 26 आगस्ट: इन्डियान सुपार लीग सुंदयै आइएसएलनि गुबुन मोनसे गोनों हान्जा एटिके-महन बागान क्लाबआ फैगौ सिजननि फुटबल लीगनि गेलेनायखौ लानानै हान्जायाव गुबुन सासे लाइमोन गेलेगिरिखौ गोरोबथा खालामनाय जाबाय।
बे गोदान गोरोबथानि गेजेरजों लाइमोन गेलेगिरि मनबिर सिंआ 2023 सिम आइएसएलआव गेलेबाय थागोन। क्लाबआ टुइटारनि गेजेरजों मिथिहोनाय बायदिब्ला 2018 नि इन्डियान सुपार कापआव गोख्रों गेलेनो हानाय मनबिर सिंखौ एटिके-महन बागान क्लाबआव गोरोबथानि गेजेरजों लाबोनानै बेनि गेलेनायाव गोख्रोंसिन जानो हागोनखौ मिजिंथिदों।
मख'नो गोनांदि, भारतनि नेसनेल फुटबल हान्जायाव स्ट्राइकार महरै गेलेबोनाय मनबिर सिंआ फैगौ 3 बोसोरसिम गोरोबथा महरै हान्जायाव गेलेगोन । फारसेथिं मनबिरआ गावनि गोदान गोरोबथाजों एटिके क्लाबआव गेलेनो मोनगोननि खुसिजों गोजोन्नाय फोरमायना बुङोदि, आइएसएलआव एटिके-महन बागानजों गेलेनो मोन्नाया आंनि थाखाय गोग्गाथावना आरो फैगौ सिजननि आइएसएलआव गोख्रोंसिन गेलेनो नाजागोन होन्ना बुङो। बेनि सिगां मनबिर सिंआ आइएसएलआव एफसि गवानि जानानै गेलेबोदोंमोन। पान्जाबनि लाइमोन गेलेगिरिआ गावनि गेलेनाय फुटबल केरियारखौ कलकातायावनो जागाय जेनबोदोंमोन।
