गोदान दिल्ली, 23 आगस्ट: रिय' अलिम्पिक गेम्सआव ब्रन्जनि मेडेल देरहानाय आरो हादतनि खेल रत्न बान्थाखौ देरहाखांनाय भारतनि आइजो रेस्टलार साक्षी मालिकआ बे बोसोरनि अर्जुन बान्थाखौ मोनैयाव गाहाय मन्थ्रि नरेन्द्र मदि आरो गेलेमु बिफाननि मन्थ्रि किरेन रिजिजुनो लाइजाम दैथायहरनानै रागा जोंखांनाय फोरमायदों। गेलेमु बिफानआ शुक्रबारखालि बे बोसोरनि अर्जुन बान्था मोन्नाय एबा देरहानाय गेलेगिरिफोरनि मुंखौ फोसावना होबाय।
जेराव आइजो रेस्टलार साक्षी मालिक आरो वेटलिप्टार मिराबाय सानुनि मुंखौ अर्जुन बान्थानि फारिलाइनिफ्राय बोखारदों। गेलेमु बिफानआ बिसोर सानै गेलेगिरिनि मुंखौ बोखारनायनि जाहोना जादों थांनाय 2016 आरो 2018 माइथायाव बिसोर सानै गेलेगिरिया खेल रत्न बान्थाखौ मोनखांबाय। जायनि थाखाय बिसोर सानैआ अर्जुन बान्थाखौ मोन्नो हाथावना नङा।
27 बोसोर बैसोनि गेलेगिरि साक्षीआ लाइजामआव लिरहरनाय बायदिब्ला साफ्रोमबो गेलेगिरिफोरानो सिमां थायोदि, जेराव गावनि मुंखौ सिगांनिख्रुइबो बांसिन मेडेल देरहानो हानाय। साक्षीआ गाहाय मन्थ्रि आरो गेलेमु मन्थ्रिनिसिम सोंथि खालामोदि, बबे मेडेलखौ देरहायोब्ला जेराव अर्जुन बान्थाखौ होनाय जायो आरो रेस्टलिं केरियारआव बेबायदि माब्ला माननि बान्थाखौ होनाय जागोन। साक्षीआ लाइजामखौ दैथायहरनानै बुंबावोदि, गाहाय मन्थ्रि नरेन्द्र मदि आरो गेलेमु मन्थ्रि रिजिजु, आंनो खेल रत्नखौ होनाय जादों आरो आंबो बेनि सायाव गोग्गानाय लादों ।
नाथाय साफ्रोमबो गेलेगिरिफोरानो सिमां दङदि, बिसोर गेलेगिरिफोरा गासै बान्थाखौ आजावनो हानाय । बेबायदि बाथ्राजों हादतनि गाहाय मन्थ्रि आरो गेलेमु मन्थ्रिनिसिम फोरमायनानै गेलेगिरि साक्षी मालिकआ अर्जुन बान्थानिफ्राय गावनि मुंखौ बोखारजानायाव गोजोन्नाय गैयै फोरमायदों।
मख'नो गोनांदि, साक्षी मालिकआ 2016 नि रिय' अलिम्पिक गेम्सआव ब्रन्जनि मेडेल देरहानायनि अनगायैबो 2017 नि कमनवेल्थ रेस्टलिं सेम्पियनसिपयाव सनानि मेडेलखौ देरहानो हानायजों लोगोसे गोदान दिल्लीयाव जालांनाय एसियान रेस्टलिं सेम्पियनसिपआव रुपानि मेडेल आरो 2018 नि कमनवेल्थ गेम्सआव ब्रन्जनि मेडेलखौ देरहानो हाबोनायजों हादत सिबिथाय होनो हानाय बिहोमानि गेजेरजों साक्षी मालिकआ बे खेबनि अर्जुन बान्थाखौ मोन्नो हागोननि गोबां मिजिंथि लादोंमोन।
