गुवाहाटी, 13 सेप्तेम्बरः एल ए सि एबा लाइन अफ एक्सुएल कन्ट्रलखौ बारलांनायनि जाहोनाव चीननि पिपुल्स लिभारेसन आर्मीनि आखायाव गोग्लैनाय सा 5 अरुणाचलनि सेंग्राफोरखौ शनिबारखालि पि एल एआ भारतीय रौनियानि आखायाव गथायनानै होयो। शनिबारखालि चीन आरो भारतनि बर्डाराव थानाय किबिटु मुंनि जायगायाव सानजौफुनि 12.30 रिंगायाव गथायनाय जायो। बे जायगाखौ इटानगरनिफ्राय 590 कि:मिः जान्थायाव थानाय थावनि होन्नानै फोरमायदों आरो बे ओन्सोलानो जाबाय भारतनि गारि-मटर खारनो हानाय जोबथा थावनि। बे थावनिखौ अरुणाचल प्रदेशनि आमजौ जिल्ला होन्नानै मख'दों आरो बे जिल्लाया चीन, भारत आरो म्यान्मारनि थाम ख'नायारि थावनि महरै दङ।
पि एल एनि आखायनिफ्राय अरुणाचलनि सा 5 सेंग्राफोरखौ भारतनि रौनियाफोरा आखायाव नाजावो आरो बिसोरखौ 14 साननि थाखाय क्वारेन्टाइनआव दोन्नायनि उनाव नख'रनि सोद्रोमाफोरनि आखायाव गथायनाय जागोन । बाथ्राखौ गुवाहाटीनि रौनिया बिफानजों लोब्बा थानाय पि आर अ पि कंसाइआ आसामनि गांसे इंराजी खौरां बिजोंनि सिगाडाव फोरमायदों। अरुणाचल सोनाब लकसभा बियाबनि एम पि किरेन रिजिजुआबो बे बाथ्राखौ फोरमायदों। मिरुनि मन्थ्रि रिजिजुआ सा 5 अरुणाचलनि सेंग्राफोरखौ भारतीय आर्मीनि आखायाव गथायनाय बाथ्राखौ रोखा खालामदों। बेनि थाखाय रिजिजुआ भारतनि रौनिया बिफाननो गावनि साबायखरखौ जासिदों।
मख'नाय बायदिब्ला थांनाय 2 सेप्तेम्बरखालि सा-सुबनसिरि जिल्लानिफ्राय अरुणाचलनि सा 5 सेंग्राफोरा गोमानानै दङमोन । सा 5 सेंग्राफोरा नास' मुंनि जायगायाव सिखार खालामनो थांदोंमोन । बे ओन्सोलनिफ्रायनो चीननि रौनियाफोरा सा 5 अरुणाचलनि सेंग्राफोरखौ खावदोंमोन। बे थासारिनि सायाव भारतीय रौनियाआ थांनाय 8 सेप्तेम्बरखालि चीननिसिम लाइजाम दैथायहरदोंमोन।
