गोदान दिल्ली, 27 आगस्ट: टीम इन्डियानि केप्टेन बिराट कहलीआ टुइटारनि गेजेरजों फोरमायदोंदि, जानुवारी 2021 आव गावनि न'याव गथ' गोरलै जोनोम जासिगोन। बिराटआ बिसि आरो बलीउड फावखुंग्रि अनुष्का शर्माजों लोगोसे सावगारि शेयार खालामनानै लिरदों आरोबाव जों जानुवारी 2021 आव सा 3 जासिगोन।
बिराट कहलीआ बे समाव इन्डियान प्रिमियार लीग (आइपिएल) आव बाहागो लानो थाखाय इउनाइटेड आरब अमीरात (इउएइ) आव दंहैयो जेराव अनुष्का शर्माया मुम्बाइआवनो दङ। बिराट आरो अनुष्काया डिसेम्बर 2017 आव जुलि जादोंमोन। बिराटआ रयेल चेलेन्जार्स बेंगालुरु टीमनि केप्टेन। बिराटआ जाय सावगारिखौ शेयार खालामदों बेवहाय अनुष्का शर्मानि बेबी बम्पखौ नुनो मोन्दों।
अनुष्का शर्मायाबो बिराट बायदिनो टुइट खालामनानै फ्रेन्सफोरजों मोजां खौरांखौ शेयार खालामदों। अनुष्का आरो बिराटआ गोबाव सम डेट खालामनायनि उनाव 2017 आव जुलि जादोंमोन। बिसोरो सानैजों 2013 आव मोनसे शेम्पु एडनि समाव लोगो मोनलायदोंमोन। एड शुटिंनि उनाव सानैखौबो गोबां खेब लोगोसे नुनो मोन्दों आरो जेंना गोनां समाव हेफाजाब होलायदों। बिराटआ गावनो गोबां खेब बुंखांबायदि अनुष्काया गावखौ मोजां सुबुं बानायदों। बियो गावनि जाफुंसारनायनि क्रेडिडखौ अनुष्कानोनो होदों।
