Bodosa

कक्राझार, 24 डिसेम्बर: गागि सोलोंथायगिरि आरो लिरगिरि प्रफेसार रमेश चन्द्र भारदवाजनो 2020 नि 17 थि उपेन्द्र नाथ ब्रह्म सुबुंथिनि फाइखि बान्थानि थाखाय सायख’दों। मख’नो गोनांदि, भारतनि राव आरो थुनलाइजों लोगोसे भारतआव ट्राइबेलफोरनि राव, थुनलाइ जौगाहोनायाव गोनांथार बिहोमा होनो हानायनि थाखाय बे बोसोरनि 17 थि इउएन ब्रह्म सुबुंथिनि फाइखि बान्थानि थाखाय सायख’नाय जायो। 23 डसेम्बरखालि गांसे रादाब बिबुंसारनि गेजेरजों उपेन्द्र नाथ ब्रह्म ट्रास्ट सुंद’यै इउएनबिटिनि मासिगिरि ङ सुबुं बसुमतारिआ फोसावनाय बादिब्ला 17 थि बड’फा उपेन्द्र नाथ ब्रह्म सुबुंथिनि फाइखि बान्थाखौ प्रफेसार रमेश चन्द्र भारदवाजनो होनो सायख’नाय जाबाय। इउएनबिटिआ हादरनि गेजेराव ट्राइबेल रावफोरखौ जौगाहोनाय बिथिङाव बिथाङा थोजासे बिहोमा होनो हानायनि थाखाय बे खेबनि सुबुंथिनि फाइखि बान्थाखौ होनो थांखि लादों। बेजों लोगोसे बिथाङा बर’ रावखौ भारत संबिजिरनि 8 थि फारिलाइयाव थिसन्नाय आरो गोसारहोनायनि फार्सेबो गोनांथार बिफाव लाबोदों। रमेश चन्द्र भारदवाजआ थांनाय 1957 माइथायनि 25 एप्रिलखालि गोदान दिल्लीनि जवाहरलाल नेहरु मार्गनि सानेडिआव जोनोम मोन्दोंमोन। बिथाङा दिल्ली इउनिभारसिटिनि सासे फरायसामोन। गावनि सोलोंथाय आयदाखौ गुवारै लानायनि गेजेराव मोनसे समाव जापाननि टकिय मुलुगसोलोंसालिआव स्पेसिएल अडिटर-इन्डियान फिल’सफिनि सायाव फोरोंथाय लादोंमोन। हादरनि बिमा राव आयदानि फार्से बिथाङा सोलोंथाय लानायजों गावनि गुवार रोंगथि आरो गियान थानायाव गोबां बान्थाफोरखौबो आजावनो हाबोनायनि गेजेराव संस्कृता-बिद्या-मारतान्धा बान्थाफोरखौ आजावनो हाबोदों। दिल्ली संस्कृत एकाडेमिआ 2014 माइथायाव बे माननि बान्थाखौ होनाय जादोंमोन। बेनि अनगायैबो बे बोसोरावनो बिथाङा संस्कृत सेबा पुरुस्कारखौ हारियानानि संस्कृत एकाडेमिनिफ्राय आजावनो हादोंमोन। बेबादिनो दिल्ली इउनिभार्सिटिनि गान्धी भवननि डिरेक्टर महरैबो बिबान सामलायनायजों लोगोसे साउथ केम्पासआव संस्कृत बिफाननि प्रफेसार महरै बिबान सामलायो। गासै 33 बोसोर दिल्ली इउनिभार्सिटिआव प्रफेसार महरै खामानि मावबोनायनि उनाव सोलोंथाय आयदानि फार्से गुवार गियान आरो रोंगथिजों गोबां राव आरो थुनलाइ सोरजिनो हानाया रायखांजाथाव। मख’नो गोनांदि, बे बोसोरनि 17 थि उपेन्द्र नाथ ब्रह्म सुबुंथिनि फाइखि बान्थानि थाखाय प्रफेसार रमेश चन्द्र भारदवाजखौ सायख’नायनि गेजेरजों गोजोन्नाय फोरमायना हामलायथि जासिदों। बे माननि बान्थाखौ फैगौ 2021 माइथायनि 10 जानुवारीखालि गुवाहाटीआव खुंनो थांखि लानाय मोनसे गोजोन हाबाफारिनि गेजेरजों प्रफेसार भारदवाजनो गथायनानै होगोन आरो बे माननि बान्थायाव गांसे मान बिलाइजों लोगोसे नोगोद 1 लाख रांनि बान्था होनाय जागोन।

कक्राझार, 23डिसेम्बरः बि टि सिनि बिसायख’थियाव हाग्रामा महिलारि दैदेन्नाय बि पि एफ राजखान्थि दोलोआ बांसानखो मासि देरहानानैबो सरकार दानो होयैनि अजदजों इउ पि पि एल, बि जे पि आरो जि एस पिआ लोगो नांनानै बि टि सिआव सरकार दानायखौ आयेननि बेरेखा जानायनि अजदजों गसर थिसन्नाय बायदियै गुवाहाटी गोजौ बिजिरसालिया 22 डिसेम्बरखालि मोनसे गोनांथार बिसारखौ फोसावनायनि उनाव हाग्रामा महिलारिआ कक्राझाराव मोनसे खौरांगिरि मेल खुंनायनि गेजेरजों खौसेथिनि गारां दैखांदों। मंगलबारखालि बेलासियाव कक्राझारनि बि पि एफ दोलोनि मावखुलियाव मोनसे खौरांगिरि मेल खुंनानै हाग्रामा महिलारिआ बि टि सिआव गोजोन, खौसेथि आरो जौगानायनि थाखाय सरकार दानो थाखाय ओन्सोलारि राजखान्थि दोलोफोरखौ खौसेथि जानो हांख्रायदों। बिथाङा बुंदोंदि, बि टि सिआव जायगानि एबा हालामनि गासै हारि-माहारिनि समान जौगाथाय आरो गोजोन थासारिनि थाखाय बि पि एफआ जायखि-जाया ओन्सोलारि राजखान्थि दोलोफोरजों खौसे जानानै सरकार दानो थियारि। मानोना माहारियारि दोलोआ जायगानि एबा हालामनि जेंना-जेंसि आरो गांनाय उखैनायखौ सुफुंनो हाया आरो गोनांथि होया। बेनिखायनो ओन्सोलारि राजखान्थि दोलोफोरा सरकार दानो थाखाय खौसेथि जानांगौ। बि टि सिआव माहारियारि राजखान्थि दोलोखौ सरकार दानो खाबु होनो नाङा। बि टि सिनि साफ्रोमबो राइजो-राजाफोराबो बेखौनो हास्थायदोंदि, बि टि सिखौ गुबुन माहारियारि दोलोनि आखायाव हगारालासैनो ओन्सोलारि राजखान्थि दोलोफोरा खौसे जानानै सरकार दानांगौ। जुदि जायगायारि दोलोफोरा खौसे जानानै सरकार दायोब्ला थारैनो बे हालामनि गासै हारि-माहारिफोरनि थाखाय समानै गोजोन, खौसेथि आरो जौगानायनि थाखाय खामानि मावलांनो हागोन। बेयाव जेबो रोखोमनि सार्थ थानो नाङा । बेयाव सोरबा चिफ आरो डिपुटि चिफ जाथारनांगौनि खोथा फैया। जायखि जाया बि टि सिखौ गुबुन माहारियारि दोलोनि आखायावल’ हगारनो नाङा । आंदि, चिफ जाथारनांगौ बेयाव दाबि गैया होन्नानै बि पि एफनि आफादगिरि आरो बि टि सिनि बारग’ गाहाय खुंगिरि हाग्रा माहिलारिआ खौरांगिरिनि गेजेरजों बुंथियो।

बि के डब्लिउ ए चिखौ दाफुंनायजों लोगोसे कक्राझारनि मिउजिक एण्ड फाइन आर्ट कलेजआबो सरकारि जासिगोन गुवाहाटी,23डिसेम्बर: सोलिफु बोसोरनि जोबथा दान  एबा डिसेम्बरनि जोबथा सप्ताहयाव आसाम बिधान सभानि जथुमनाय जागोन। अदेबानि बे जथुमनाया आथिखालनि आसाम जुथाय सरकारनि जोबथा जथुम्मा जागोन। गिबि मन्थ्रि सर्बानन्द सनवालनि दैदेन्नाय राइज्यो सरकारा थांनाय माखासे दाननि सिगाङाव बर’ रावखौ आसामनि गुबुन मोनसे राइज्योयारि राव एबा सरकारि राव महरै गनायथिनाय जादोंमोन। बेनि उनाव बर’ रावआ राइज्योयारि राव महरै आबुं महर मोन्नो एबा गनायथि जानो थाखाय फैगौ आसाम बिधान सभानि जथुमनाया जोबोद गोनांथार। अदेबानि बे जथुमनायाव बर’ रावखौ आसाम राइज्योनि राइज्योयारि राव महरै गनायथि जागोननि बांसिन मिजिंथिदों। फैगौ डिसेम्बर दाननि जोबथा दानाव खुंनो लानाय आसाम बिधान सभानि जथुमनायाव बर’ रावखौ राइज्योयारि राव महरै गनायथिनाय आयेन एबा बिलखौ बारहोनायनि फारसे गोनांथारै सावरायगोन। मख’नो गोनांदि, बड’लेन्ड टेरिटरियेल रिजन सुंद’यै बि टि आर गोरोबथाखौ मिरु आरो आसाम सरकारजों दुलाराय बर’ फरायसा आफाद आरो एन डि एफ बिनि मोनब्रै आफादफोरजों गोरोबथा जादोंमोन। मंगलबारखालि जनता भवनाव आसामनि गिबि मन्थ्रि सर्बानन्द सनवालनि दैदेन्नायाव जानाय राइज्योयारि केबिटेननि मोनसे जथुमनायाव फैगौ बिधान सभा जथुमनायनि सावरायमायाव बर’ रावखौ राइज्योयारि राव महरै गनायथिनाय आरो हा अरायथा खालामना होनायनि सायाव गोनांथारै सावरायगोन। दिनैनि बे सावरायनायाव आइजोफोरनि समाज अन्साय बिथिङाव मोन्नै गोदान आयेनखौ दाफुंनायनि थांखि लानाय जायो। केबिनेटआ थांखि लाबावनाय जादोंदि, नाबार्डनिफ्राय आर आइ डि एफनि सिङाव 91 कौटि लन लानायनि गनायथि होनायजों लोगोसेनो डिग्री कलेजफोराव लाइब्रियान मासिनि बिजाथिफोरखौ सरकारि खालामनायनि मोनसे आयेनखौ आजावना लादों । केबिनेटआ कमतापुर मटक, मरान आरो बि टि सिनि बायजोयाव थानाय बर’ कचारि वेलफेयार अट’नमास काउन्सिलखौ दाफुंनायनि मोनसे आयेनखौ गनायथिनायनि थांखि लानाय जादों। बेनि अनगायैबो मख’जाथावना बाथ्रादि, कक्राझार सदर सहरनि साखाथियाव थानाय कक्राझार मिउजिक एन्ड फाइन आर्टस कलेज आरो जरहातआव असम सत्रिय संगित महाबिद्यालय लुफुंनायनि फारसेबो गनायथिनाय बिलखौ आजावना लानाय जादों । गुबुन गुबुन मावनां थांखिफोरनि फारसे मावफुंनो थांखि लानायनि अनगायैबो आसामनि मेडिकेल कलेजआव बिबान सामलायनाय एबा साख्रि मावनाय फाहामगिरिफोरनि थाखाय मोनसे बिथांखिखौबो मावफुंनायनि थांखि लादों। बुंनो थाङोब्ला बोसोरनि जोबथा दान डिसेम्बरनि जोबथा सप्ताहयाव खुंजानो गोनां आसाम बिधान सभानि जथुम्मायाव गोजौयाव मख’नाय आयदाफोरा गनायथि जायोब्ला राइजो-राजाफोरनि थाखाय जोबोद मुलाम्फा गोनां जागोन। जरखायै बर’ हारिनि थाखाय आसाम राइज्योनि गेजेराव बर’ रावआ राइज्योयारि राव एबा सरकारि राव महरै गनायथि जानायानो बयनिख्रुइबो देरगाथाव जागोन। बेनि अनगायैबो गोलाव बोसोरनि कक्राझार मिउजिक एन्ड फाइन आर्टस कलेजनि लुफुंनो थांखि लानायाबो जोबोद गोजोन्थाव जादों बर’ हारिनि थाखाय।

कक्राझार, 23डिसेम्बरः बि टि सिआव बि जे पि आरो जि एस पिखौ लोगोयाव लाफानानै सरकार दाखांनायनि उनाव इउ पि पि एल दोलोआ मंगलबारखालि कक्राझारनि बड’फा कालसारेल कमफ्लेक्सआव दोलोनि मिरु मावफुं आफादनि मोनसे मेल जथुमनाय जादों। बे मेलआव गोदानै बिबान आजावनाय बि टि सिनि गाहाय मावफुं सोद्रोमा प्रमद बर’आ बाहागो लायो। मेल जोबखांनायनि उनाव बिथां बर’आ खौरांगिरिफोरनि सिगाङाव फोरमायनाय बायदिब्ला बे मेलाव जोबलांनाय बि टि सिनि बिसायख’थियाव दोलोनि खामानि मावनाय आरो जाफुंसारनाय लोगोसे फैबाय थानाय समफोराव दोलोआ खामानि मावनो लानाय माखासे थांखिफोरनि सायाव सावरायलायनाय जादों। बिथाङा बुंबावोदि, इउ पि पि एल दैदेन्नाय बि टि सिनि जुथाय सरकारा हालामनि गासै हारि-माहारिनि थाखाय समान मोन्थाय आरो समान जौगाथायनि खामानि मावलांगोन होन्नानै फोरमायथियो। दोलोनि माव’फुं आफादगिरि रोनगोरा नार्जारिनि मासि सामलायनानै दैदेन्नाय दिनैनि बे मिरु मावफुं आफादनि मेलआव मिरु आफादनि सोद्रोमा आरो दैदेनगिरिफोरखौ लाफानानै खमैबो 1 रोजानि बांसिन सोद्रोमाफोरा बाहागो लाफैदोंमोन।

कक्राझार/दिल्ली, 23डिसेम्बरः दिल्ली बर’ बाथौ गौथुमनि गासै मावथि सोद्रोमाजों लोगोसे हादतनि राजथावनि दिल्लीआव थानाय एबा राइज्यो जानाय गोबां बर’ फिसाफोरा बावैसो जानानै थांनाय बि टि सि बिसायख’थियाव देरहासार जानो हानाय गासै बिजाथिफोरखौ बरायनायजों लोगोसे गोदानै सरकार दानाय प्रमद बर’ आरो बिथांनि गोदान सरकारनि गासैबो राजखान्थि दोलोनि मावफुं सोद्रोमा आरो एम सि एल एफोरनिसिम हामब्लायथि हरनानै जाहाथे बि टि सि/ बि टि आरखौ मोजाङै मोजां दैदेनलांनानै बर’ हारिनि सुबुंफोरनि आरो बि टि आर हालामनि थाखाय जौगानाय लाबोनो हायो बेनि थाखाय आनान गसाइ बोराइ बाथौनि सेराव आर’ज खालामदों।

कक्राझार,13डिसेम्बरः गोलाव सम जोबोद गोसो गुद गुद नेनानै थाबोनाय बिटिसि बिसायख’थिनि फिथाइआ मैया एबा 12 डिसेम्बरखालि हर गेजेर सिमनि गेजेराव नुजाफैबाय। बिसायख’थिनि सिगां आरो उनाव जरैबादियै बिसायख’थिनि बार बारनाय नुनो मोन्दोंमोन बिब्दि फिथाइ नुजायाखैब्लाबो नाथाय राइजोराजा भटार फोरा खावसे सोलायनाय, खावसे गोजाम थांखि आरो खावसे गोदान थांखिखौनो बोजबनानै लानाय नुनो मोनबाय। बिसायख’थिनि उन-सिगां मोनफ्रोमबो दोलोयानो जुथाय गोहो सामलायनायनि दाबि खालामनायबो नुनो मोन्दोंमोन। नाथाय फिथाइ बादियै मोनसेबो दोलोयानो बिटिआर सरकार दानो हानायसेबां मासि देरहानो हानायाव जाफुंनो हायाखिसै। मोन 40 मासिनि गेजेराव बिटिसि सरकार दानो थाखाय मोन 21 मासि गोनांथार । नाथाय नुनो मोन्दों बे खेबनि बिसायख’थियाव बिजेपि, बिपिएफ आरो इउपिपिएलआ गाव हार्सिङैनो सरकार दानो हानायसेबां मासि देरहानो हायाखिसै। बिसायख’थि फिथाइ बदियै- बिपिएफ 17, इउपिपिएल 12 ,बिजेपि 9, जिएसपि 1 आरो कंग्रेस-एआइइउडिएफ 1 मासि देरहानो हादों। सरकार दानांगौ जायोब्ला मोनथामनि गेजेराव मोन्नैया ज’ जालायनानैसो सरकार दाफुंनो हानायनि गोहो फैगोन। जुदि क्वालिसन सरकार दानायाव फैमाल जायोब्ला बे खेबयाव दिन्दां बिटिसि एसेमब्लि जानानै थानायनि मिजिं दङ। बेराफार्से क्वालिसननि बाथ्रा फैयोब्ला बे समाव बिजेपि-बिपिएफनि गेजेराव जुथाय सरकार दानायखौ जाथावै बादि नुहरो। मोनोना बिसायख’थिनि सिगांनिफ्राय एबा बिसायख’थि फोसावदिंनाय समाव बिजेपि-बिपिएफ दोलोनि गेजेराव जेरैबादियै सोंखारिलायनाय, अजद होलायनाय, गोखा-गोखै रावजों बाथ्रा बान गावनानै गाग्लोबलायनानै बिटिसि बिसायखथियाव एलाइन्स जाया होन्नानै आलादा-आलादायै बिसायख’थि गेलेदोंमोन बेनि उनाव फिन क्वालिसन जागोनखौ गोजान नुहरो। गुबुनफार्से बे रोखोमैनो गोलाव सम राजखान्थियारि सुथुर महरै राजखान्थि गेलेबोनाय बिपिएफ-इउपिपिएल क्वालिसन सरकार जागोनखौबो गोजान नुहरो। मानोना थांनाय 27 जानुवारीयाव खानाय बिटिआर रादायखौ बिपिएफआ मावफुङा होन्नानै बेनि हेंथायै बुबोबाय थादों । गुबुनफार्से बिटिआर रादाय मावफुंनायनि गासै बिबान लादों इउपिपिएल दोलोया। बिब्दिखौ नायोब्ला मोन्नै दोलोनि थांखिया गोरोबलाया। बेखायनो गोरोबलायनानै बिपिएफइउपिपिएल जुथाय सरकार दानो हानायखौ नुहरा। नाथाय बेखौबो बुंनो हायो-राजखान्थियाव जाथावै मोनबो हाबायानो गैया। हारिनि गेदेतथार स्वार्थयाव खौसे जालायनानै हाबा मावलांनायनि लामा लानायाबो जाथावै नङा। बेराफार्से गोबाङानो सावरायनो लादों बिटिआर रादाय मावफुंनायनि थागिदायाव बिजेपि-इउपिपिएलनि जुथाय सरकार जानाया गोनांथार। मानोना दासान्दि मिरु आरो राइज्यो सरकार मोननैयावबो बि जि पि दैदेन्नाय सरकार दङ। मख’नोगोनांदि बि जे पि हान्जायाबो थांनाय 3 थि बि टि सि बिसायख’थियाव सासेल’ सोद्रोमा देरहानो हादोंमोनब्लाबो बे खेबनि 4 थि बि टि सि बिसायख’थियाव सा 9 सोद्रोमा देरहानो हानायजों बि टि सि ओनसोलाव गावसोरनि गोहो बांनायखौ एसेब्लाबो दिन्थिनो हादों। गुबुन फारसेथि उदालगुरि आरो बाक्सा जिल्लानि भटार राइजो राजाफओरा बि पि एफ हान्जाखौ नेवसिगारदों होनजायो मानोना बे मोननैबो जिल्लायाव बि पि एफआ मोन 3 ल मासि देरहानो हादों। बेनि गेजेराव उदालगुरिआव मोनसे 1 आरो बाक्सायाव मोन 2। नाथाय चिरां आरो कक्राझार जिल्लानि भटार राइजो राजाफोरा बि पि एफ हान्जाखौ बजबना लादोंखौनो होनजायो मानोना चिरां जिल्लायाव मोन 5 आरो कक्राझार जिल्लायाव मोन 10 मासि देरहानानै गासै मोन 17 मासि देरहानायाव जाफुंसारनो हादों बि बि एफ हान्जाया।