डुबाइ, 7 सेप्तेम्बर: 13 थि सिजन इन्डियान प्रिमियार लीग सुंद'यै आइ पि एलनि मेच गेलेगोन फारिलाइखौ 6 सेप्तेम्बरखालि फोसावना होबाय। आइ पि एलनि सियारमेन ब्रजेस पाटेलआ मेचनि फारिलाइखौ फोसावना होयो। मख'नो गोनांदि, भारत हादतआव करना भाइरासनि गोसारनाया गिथावना महर लानायनि जाहोनाव बे सिजननि आइ पि एलखौ इउनाइटेड आरब इमिरेट हादतआव खुंनो थाखाय थांखि लानायजों टुर्नामेन्टनि गेलेनाया सोलिफु सेप्तेम्बर दाननि फैगौ 19 निफ्राय 10 नभेम्बरसिम सोलिबाय थागोन। गासै 53 सान नाङै आइ पि एलनि गेलेनाया इउ ए इनि मोन 3 क्रिकेट स्टेडियामआव सोलिगोन। अदेबानि बाहागो लानाय आइ पि एलनि मोन 8 हान्जाफोरनि गेजेराव 14-14 मेचखौ गेलेगोन। मोन 8 हान्जाफोरनि गेजेराव गासै मोन 60 मेचफोरखौ गेलेबोनायनि जोबथा बुब्लियाव मोनसे एलिमिनेटर मेच, मोननै क्वालिपायार मेच आरो फाइनाल मेचखौ गेलेगोन।
मिथिनाय बायदिब्ला 13 थि सिजन आइ पि एलनि गिबि मेचखौ 19 सेप्तेम्बरखालि थांनाय सिजननि सेम्पियन हान्जा मुम्बाइ इन्डियान्स आरो रानार आप हान्जा चेन्नाइ सुपार किंसनि गेजेराव मोगा-मोगि गेलेगोन। गिबि मेचखौ गेलेनायनि सिगांनो चेन्नाइ सुपार किंस हान्जानि सानै गेलेगिरि दिपक साहर आरो रितुरास गाइक'यारजों लोगोसे गुबुन सा 11 स्टाफ मेम्बार्सफोरनि देहायाव करना सन्देरदों। बेनि अनगायैबो इउ ए इआव बि सि सि आइनि सिनियर मेडिकेल अफिसाराबो करना भाइरासजों सन्देरजादों। बुधबारखालि बि सि सि आइनि ट्रेजारार अरुन दुमालआ बुङोदि, फारिलाइयाव थिखानाय बायदियै आइ पि एलनि गासैबो मेचफोरखौ थि समावनो गेलेगोन। इउनाइटेड आरब इमिरेट हादतनि मोन 3 सहर फारियै डुबाइ, आबु धाबि आरो सारजाह स्टेडियामयाव मेचफोरखौ गेलेगोन। बि सि सि आइनि बिबानगिरिया बुंनाय बायदिब्ला मोनानि 7.30 रिंगानिफ्राय आइ पि एलनि गेलेनाया जागायजेनगोन आरो गुबुन मोनसेबाव गेलेनायनि समा बेलासिनि 3.30 रिंगानिफ्राय जागायजेनगोन।
