कक्राझार, 6 अक्टबरः बर’ हारिनि रैखाथि, थामोन्था आरो उदांस्रिनि थाखाय 30 बोसोर नाङै हाग्रायाव थानानै आखाइयाव हाथियार लाना सरकारनि हेंथायै सोमावसारबोनाय आरो जांख्रिखांबोनाय बर’नि बिग्रायारि आफाद नेसनेल डेमक्रेटिक फ्रन्ट अफ बर’लेन्ड एबा एन डि एफ बिआ हाथियार गथायनानै हाग्रानिफ्राय ओंखारबोना थांनाय 27 जानवारीयाव जानानै थांनाय बर’फोरनि थामथि गोजोन गोरोबथा थामहिनबा बि टि आर गोरोबथायाव सागान होगिरि महरै बाहागो लाफैदों। बि टि आर गोरोबथाया जानानै थांनायनि उनावनो एन डि एफ बिनि मोनब्रैबो हान्जाफोरखौ सिफायनाय जादों। अदेबानि बि टि आर गोरोबथानि दफाफोराव रग-रग’यै लिरनाय दङदि बे गोरोबथानि गेजेरजोंनो जोबथेसालियाव थानांनाय गासै एन डि एफ बि सोद्रोमाफोरनि हाइनिस आरो न’न हाइनिस केसफोरखौ बोखारनानै लानाय जागोन। लोगोसे एन डि एफ बिनि गासैबो सोद्रोमाफोरनो रेहिबेलिटेसन आरो बड’लेन्ड सोमावसारनायाव मुख्लं जानाय नख’रनि सोद्रोमाफोरनो रांखान्थि अन्सुंथाय जगायनानै होगोन।
बेराफार्से एन डि एफ बिनि गायसनगिरि रन्जन दैमारिआबो जोबथेसालियाव थानाय समनि गेजेरावनो बि टि आर गोरोबथायाव माखासे समनि थाखाय जोबथेसालिनिफ्राय उदां जानानै सागान होफैदों । नाथाय एन डि एफ बिफोरनि थाखाय दुखु नांथाव बाथ्रादि, बि टि आर गोरोबथा जानाया 8 दान सम बारलांसेयावबो दिनैसिमाव बारग’ एन डि एफ बिफोरनि थाखाय गोरोबथानि दफायाव जेरैबायदि मख’नाय दंमोन बेफोर खामानिखौ मावफुंनो जागायनायनि राहा लानायखौ नुनो मोनाखै। गोरोबथाया जानानै थांनायनि 8 दान सम बारलांनायनि उनावबो जोबथेसालियाव जोबनानै दोनजानाय गोबांथार बारग’ एन डि एफ बिनि सोद्रोमाफोर, दैदेनगिरिफोरा दिनैसिम जोबथेसालिनिफ्राय उदां जायाखै आरो बिसोरनि केसआबो बोखारनानै लाजायाखै। मख’जाथावसिन बाथ्राया जाबाय बारग’ एन डि एफ बिनि गायसनगिरि रन्जन दैमारिआ गावबो सासे गोजोन गोरोबथानि सागानगिरि हिसाबै दासिमाव जोबथेसालिनिफ्राय उदां जानो हायाखै। बेराफार्से गोरोबथानि दफाफोराव मख’नाय बादियै बारग’ एन डि एफ बिनि गासै सोद्रोमाफोरनि रेहिबिलेटिसननि खामानिखौबो मावफुंनो सरकारा थांखि लानायखौ नुनो मोनाखै। बेखौ लानानैनो दिनै समबारखालि बि टि ए डिनि दरब्रै जिल्लाफोर फारियै- कक्राझार, चिरां, बाक्सा आरो उदालगुरिजों लोगोसे राइज्योनि गुबुन गुबुन जिल्लाफोराव बारग’ एन डि एफ बिनि मोनब्रैबो हान्जानि गासै दैदेनगिरि आरो सोद्रोमाफोरा सोमावसारनाय हाबाफारि बान्जायो। बे सोमावसारनाय हाबाफारि बान्जायनायनि गेजेरजों बारग’ एन डि एफ बिनि दैदेनगिरि आरो सोद्रोमाफोरा बि टि आर गोरोबथानि दफाफोरखौ थाबैनो मावफुंनो जरखायै एन डि एफ बिफोरनि रिहेबिलिटेसन, केस उइड्र खालामनायखौ मावफुंनो दाबि खालामदों। बेबादिनो कक्राझार जिल्लानि जिल्ला बेंगिरिनि मावखुलिनि दरखं मोखाङाव जिल्लानि सिङाव थानाय गोबां बारग’ एन डि एफ बिनि दैदेनगिरि आरो सोद्रोमाफोरा जमा जानानै बि टि आर गोरोबथानि दफायाव मख’नाय बादियै जोबथेसालियाव जोबनानै दोनजानाय गायसनगिरि रन्जन दैमारिजों लोगोसे गासै केडारफोरखौ उदां खालामनो बारग’ एन डि एफ बिनि सोद्रोमाफोरनो रिहेबिलिटेसन होनो आरो बड’लेन्ड सोमावसारनायाव मुंख्लं जानाय नख’रनो रांखान्थि अन्सुंथाय होनो थाखाय सरकारनिसिम दाबि दैखाङो। बे दाबिफोरखौ लानानैनो समबारखालि सोमावसारनायजों लोगोसे कक्राझार जिल्ला बेंगिरिनि जोहै गिबि मन्थ्रि सर्बानन्द सनवालनिसिम गांसै गोसोखां बिलाइ दैथायहरो।
बबेखानि बारग’ एन डि एफ बि सोद्रोमाफोरा बि टि आर गोरोबथानि सासे सागानगिरि जानानैबो रन्जन दैमारिआ दासिम जोबथेसालियाव थानांनायखौ गोथौयै दुखु मोन्नाय फोरमायो। बेबायदिनो चिरां, उदालगुरि आरो बाक्सा जिल्लानि दाब दाब जायगाफोरावबो बारग’ एन डि एफ बिफोरनि सोमावसारनाया समबारखालि बे एखे दाबिफोरखौ लानानैनो जानानै थाङो। बि टि ए डिनि बाइजोयाव थानाय सनितपुर जिल्लानि ढेकियाजुलियावबो बारग’ एन डि एफ बि सोद्रोमाफोरा बि टि आर गोरोबथानि दफाफोरखौ थाबैनो मावफुंनो आरो बारग’ एन डि एफ बि सोद्रोमाफोरनि थाखाय थाबैनो फसंथानाय राहा जगायनानै होनो दाबि खालामनानै सोमावसारनाय हाबाफारि बान्जायदों। सनितपुर जिल्ला बारग’ एन डि एफ बि क-अर्डिनेसन कमिटिया फुंनि 11.00 रिंगायाव ढेकियाजुलि महकुमा बेंगिरिनि दरखं मोखाङाव सोमावसारनाय हाबाफारि बान्जायनायनि गेजेरजों महकुमा बेंगिरिनि जोहै माखासे दाबिफोरखौ लानानै गिबि मन्थ्रि सर्बानन्द सनवालनिसिम गोसोखां बिलाइ दैथायहरो।