गेंटक, 23 सेप्तेम्बर: सिक्किम सरकारा राइज्योयाव थानाय दावबायथिलि जायगाखौ दावबायारिफोरनि थाखाय थाबैनो बेखेवफिन्नो थांखि लाबाय। थांनाय सप्ताहयाव सिक्किमनि गिबि मन्थ्रि पि एस तामांनि बाहागो लानायाव जानाय मोनसे गोजौ थाखोनि सावरायनाय मेलाव थांखि लानाय बायदियै फैगौ 10 अक्टबरनिफ्राय दावबायथिलि जायगाफोरखौ बेखेवगोन। लोगोसे राइज्योनि सुबुंफोरखौ फैगौ 1 अक्टबरनिफ्राय गुबुन गुबुन जायगायाव थांलाइ-फैलाय खालामनो हानायनि राहाखौबो उदाङै हगारनाय जागोन। सिक्किम सरकारा थांखि लादोंदि, फैगौ 10 अक्टबरनिफ्राय दावबायथिलिफोरखौ बेखेवनायजों लोगोसे हटेल, न' भारा थानाय बेनि सायावबो खुलिनो गनायथि होबाय। गिबि मन्थ्रि तामांया थांनाय सप्ताहयाव गेंटकआव जानाय मोनसे मेलाव गुबुन गुबुन आफादनि दैदेनगिरिफोरजों गोनांथारै सावरायलायनायबो जादों ।
राइज्योयाव कभिड-19 नि गुवारै गोसारनायजों सुबुंफोरनि फालांगि राहाया थाथ'नो गोनां जानायाव रांखान्थि हालोदआ जोबोद गाहायाव फैनायखौ नोजोर होनानै राइज्योनि रांखान्थिखौ गोख्रों खालामनो थांखिजों बन्द' जानाय दावबायारि जायगाफोरखौ खुलिफिन्नो थांखि लादों।
मिथिनाय बायदिब्ला थांनाय 5 मार्चनिफ्रायनो सिक्किमआव गुबुन हादतनि दावबायारिफोर हाबफैनायखौ बन्द' खालामनाय जादोंमोन आरो राइज्योनि सुबुंफोरा बेफोर दावबायथिलियाव थांनायखौ17 मार्चनिफ्राय होबथानाय जादोंमोन। बोसोरफ्रोमबो दावबायारिफोरनि रांखान्थिजों राइज्यो सरकारा थोजासे रां बुथुमनो हाबोनायनि गेजेराव थांनाय मार्च दाननिफ्राय कभिड-19 नि जाहोनाव रांखान्थिया फारसेनिफ्रायनो ख'हा जादों। राइज्यो सरकारा मिथिहोनाय बायदिब्ला 27 सेप्तेम्बरनिफ्राय दावबायारिफोरा हटेल आरो न' भारानि थाखाय बुकिं खालामनो हागोन।
