भबानिपुर, 5 नभेम्बर: दुलाराय बाथौ महासभानि बान्जायनायाव बुधबारखालि सालबारियाव सालबारि बियाबनि इउपिपिएल दोलोनि बिजाथि बिनद मुसाहारिनि हेफाजाबाव मोनसे गुवार सावरायनाय मेलआ जोबनानै थाङो। दुलाराय बाथौ महासभानि दैदेनगिरि पद्मधर बसुमतारिनि मासि सामलायनायाव जानाय बे गोनां मेलआव दुलाराय बाथौ महासभा, एबसुनि सालबारि दख'रा आफादनि दैदेनगिरिजों लोगोसे माखासे लिरगिरि, थुनलाइगिरि, देंखोगिरि, समाज सिबियारिफोरा बाहागो लायो। मेलआव इउपिपिएल दोलोनि सालबारि बियाबनि बिजाथि बिनद मुसाहारिया गावनि बिबुंथियाव बुङोदि, बिटिआरआव दासान्दि मोनसे हाथियार उदां समाज सोर्जिनो हादों। बे बिथिङाव इउपिपिएल दोलो, एबसुजों लोगोसे राइजो-राजाफोराबो जर’खा बिहोमा होदों। फैगौ सानफोराव बिटिआरआव मोनसे गेनाखान्थि उदां, गोग्गो समाज सोर्जिनायनि थाखाय इउपिपिएल दोलोआ सिगांग्रो बिबान लानांगोन। फैगौ सानाव बिटिआरआव मोनसे गोख्रों सरकार दाफुंनांगोन।
लोगोसे गोग्गो समाज दाफुंनायनि बिथिङाव साफ्रोमबो मेलेमजिबि सांग्रां सुबुंफोर आरो गुबुन गुबुन हान्जा आफादजों लोगोसे राइजो-राजाफोरा इउपिपिएल दोलोनि जानानै आबुं हेफाजाब होनो थाखाय आवगायबोनांगौ। बिनद मुसाहारिया गावनि बिबुंथियाव बिटिआरआव मोनसे गोग्गो सरकार दाफुंनायजों आबुं हेफाजाब होनाय साफ्रोमबो मेलेमजिबि सांग्रां सुबुं आरो हान्जा आफादखौ बिबान लानो थाखाय फोसावो। मेलआव दुलाराय बाथौ महासभानि मिरु आफादगिरि हलिराम मुसाहारि, लेङाइ आफादगिरि महन स्वर्गियारी, गाहाय नेहाथारि बसन्त स्वर्गियारी, बोसोनगिरि निलकान्त बर'जों लोगोसे माखासे गागि सुबुंफोराबो बिबुंथि लाखियो। मख'नो गोनांदि, बे खेबनि बिटिसि परिषद बिसायख’थियाव दुलाराय बाथौ महासभाया इउपिपिएल दोलोखौ आबुं हेफाजाब होगोन होन्नानै मिथिहोयो।
