नाग्रिजुलि, 26 सेप्टेम्बरः बाक्सा जिल्लानि भारत-भुटान सिमाजों नांजाबनाय नाग्रिजुलि ओनसोलाव सुरां सिकारिफोरनि आयेन बेरेखायै फालांगि महराव खामानि मावनाय जाथाया सोलिबाय थादों। शुक्रबारखालि भारत-भुटान सिमा ओनसोलनि नाग्रिजुलि पुलिस बादानि सिङाव थानाय दावबायथिलि बगामाटिआव 24 नं एस एस बि हानजानि रङिया जि केम्पानिनि लोगो नायसंगिरि मिलन चन्द्र शीलनि दैदेन्नायाव एसएसबिनि हानजाया मोनसे जरखा सुलुंखौ मोन्नानै संदानहैनायाव केक जिबौखौ बोखांनो हानायाव जाफुंसारदों। बेनि बागै मिथिनो मोन्नाय बादिब्ला, एस एस बि हानजानि जवानफोरा मोनसे जरखा सुलुंनिफ्राय जिब-जुनारनि सुरां फालांगि खालामनाय फोरमानथिखौ मोननो हादोंमोन।
बे सुलुंनि गेजेरजोंनो एसएसबि हानजाया सिमा ओनसोलनि बगामाटिआव सहैनानै संदान्नो आरो हाजोनि साखाथिजों थाबाय लांनाय सानै सुबुंखौ हमो। फारसेथिं सानै सुबुंआ औवानि हासुंआव सोनानै लाबोनाय केकखौ गारनानै खारो। उननि समाव एसएसबि जवानफोरा केकखौ बोखांनानै लाबोयो आरो बिसोर सानैखौबो हमनो हायो। एसएसबि हानजाया केक सापखौ बाक्सा जिल्लानि हाग्रा संमन्डलनि सिङाव थानाय कुमारिकाता हाग्रा बिबानगिरिनि मावख'आव गथायनानै होयो। कुमारिकाता हाग्रा बिबानगिरि मावख'नि मावफारि बसन्त बर' आरो कृष्ण कान्त बर'आ बुंनाय बादिब्ला, बोखांनो हानाय केक सापखौ मानास नेसनेल पार्कआव हगारनाय जागोन।
