चिरां, 5 डिसेम्बरः बि टि सि बिसायख'थिनि समआ खाथिनिफ्राय खाथिसिन सफैनाय हिसाबै गुबुन गुबुन बियाबफोरजों लोगोसे चिरां जिल्लानि मोन 7 बियाबफोरावबो दासान्दि गुबुन गुबुन राजखान्थि हान्जाफोरनि बिसायख'थि फोसावदिंनाया मुखुबै सोलिगासिनो। 4 डिसेम्बरखालि चिरां जिल्लानि सिङाव थानाय बेंतल जांख्रिखां फोथाराव बि पि एफ दोलोनि मोनसे बिसायख'थि फोसावदिं मेलआ जानानै थाङो। बे हाबाफारियाव बाहागो लानानै 13 नं चिरां बियाबनि बि पि एफनि बिजाथि बि. सावरायगोरा (अमर बसुमतारी)आ खौरांगिरिनि सिगाङाव फैगौ खुंजानो गोनां बि टि सि बिसायख’थिखौ गोजोनै गोजोन खुंफुंजानो हानाय बादि बयखौबो बाहागो लानो थाखाय राइजो-राजाफोरखौ खावलायो।
लोगोसे बिसायख'थियाव देरहायोब्ला बियाबनि सिङाव थानाय आबाद, लामा-दालांजों लोगोसे बारग' एन डि एफ बिफोरनि थानाय गोबां केस आरो रिहेबिलेटेसननि खामानिखौ सिगांग्रो मावगोन होननानै फोरमायो। लोगोसे खौरांगिरिनि सिगाङव बि. सावरायगोराया आगुनि एन डि एफ बिनि गाहाय नेहाथारी दानि 14 नं चिरां दुवार बियाबनि इउ पि पि एलनि बिजाथि रन्जित बसुमतारी (बि. आर. फेरेंगा)खौ थांखिनानै बारग' एन डि एफ बि सोद्रोमाफोरखौ गाज्रि राव बाहायनानै बखिनायनिफ्राय जानगाराव थानो आरो मोजां साननाय हनायजों आगान सुरनानै समाजनि मोजां खामानि मावनो खावलायो।
