कक्राझार, 26 सेप्तेम्बर: थांनाय 27 जानुवारी, 2020 अक्टखालि जालांनाय बरफोरनि 3 थि गोजोन बिटिआर गोरोबथानि रादाय बायदियै गासै दफाफोरखौ मावफुंनायनि हाबाफारिखौ सरकारा जागायहांबाय। बे गोरोबथानि दफा बायदियै सिगांनि थाखानाय बिटिएडिनि मुंखौ सोलायनानै बिटिआर खालामबाय। बेजों लोगोसेनो बिटिआर गोरोबथानि माखासे दफाफोरा सिगांग्रो फारि-फारियै मावफुंजानायनि लामायाव। गोरोबथानि दफाफोरखौ मावफुंनो थाखाय मोनसे कमिसनबो दानानै होनाय जाबाय। बे कमिसनखौ आसामनि बारग' सिफ सेक्रेटारि पि पि बर्माया दैदेनगोन। लोगोसे बे कमिसिनाव सोलिफु राइज्यो बेंगिरि बिटिसि खुंथायनि गाहाय खुंगिरि राजेश प्रसाद, एबसुनि लेडाइ आफादगिरि जयन्त बसुमतारि आरो डालिम बायनमोनहा बिटिआर गोरोबथानि दफाफोरखौ मावफुंनाय आयदानि सायाव खामानि मावफुंगोन । बे बरफोरनि 3 थि जारिमिनारि गोजोन गोरोबथानि दफाफोरखौ मावफुंनायनि थाखाय खामानि जागायनायखौ लानानै बिटिआर हालामनि थागिबि राइजो-राजाफोरनि गेजेराव रंजानायनि मोनसे दोहौ सोमजिखांदों। बे बिटिआर गोरोबथानि दफाफोरखौ मावफुंनो जागायनायखौ इउपिपिएल आरो दुलाराइ बर' फरायसा आफादखौ लाफानानै गोबांथार बर' आफाद गौथुम आरो गुबुन हारिनि आफाद गौथुमफोराबो गोसो गोर्बोजों बरायदों आरो बिटिआर गोरोबथानि साफ्रोमबो सागानगिरिफोरजों लोगोसे गाहाय मन्थ्रि नरेन्द्र मदि, मिरु नख'र मन्थ्रि अमित शाह, आसामनि गिबि मन्थ्रि सर्बानन्द सनवाल आरो आसामनि मन्थ्रि ड० हिमन्त बिश्व शर्मानिसिम हामलायथि आरो साबायख'र जासिदों।
शुक्रबारखालि कक्राझाराव इउपिपिएलनि मावखुलियाव खुंनाय मोनसे खौरांगिरि मेलाव इउपिपिएलनि आफादगिरि प्रमद बर'आ बिटिआर गोरोबथानि दफाफोरखौ मावफुंनो सरकारनि जागायजेन्नायखौ गोसो गोर्बोजों बरायनानै फैगौ समफोराव गोरोबथानि गासैबो दफाफोरा आबुङै मावफुंजानानै बिटिआर हालामनि जौगानाय लाबोनो हागोनखौ मिजिंथिनाय फोरमायो। बिथाङा बुङोदि, दिनैनि साना बिटिआर हालामनि थागिबि सुबुंफोरनि थाखाय जोबोर गोजोन्थाव आरो रंजाथाव सान। मानोना थांनाय 27 जानुवारीयाव जालांनाय बिटिआर गोरोबथानि दफाखौ मावफुंनाय हाबाफारिया जागायजेनबाय। फैबाय थानाय समफोराव बिटिआर गोरोबथानि दफाफोरा मोनसेनि उनाव मोनसे आबुङै मावफुंजासिगोन। बे दफाफोरखौ मावफुंनायनि गेजेरजोंनो बिटिआर हालामनि थागिबि सुबुंफोरनि गेजेराव जौगानाय, गोजोन खौसेथि, अनलायनाय आरो गोग्गो समाजनि थासारिया महर मोनसिगोन होन्नानै बर'आ बुङो। बेजों लोगोसेनो बिटिआर गोरोबथायाव सागान होफानाय एनडिएफबि, एबसु आरो इउबिपिअनि दैदेनगिरिफोरनिसिमबो गाहाम हामलायथि बाउहरनायजों लोगोसे साबायख'र जासियो आरो बिटिआर गोरोबथानि दफाफोरखौ जौसे जोखोन्दो मावफुंनो थाखाय इउपिपिएलनि आफादगिरि प्रमद बर'आ मिरु आरो आसाम सरकारखौ खावलायो। एरैहाय एबसुनि लेडाइ आफादगिरि जयन्त बसुमतारिया कक्राझारनि बागानसालियाव थानाय मिरु एबसुनि गाहाय मावखुलि बड'फा हाउसयाव मोनसे खौरांगिरि मेल हांख्रायनायनि गेजेरजों बिटिआर गोरोबथानि दफाफोरखौ मावफुंनो सरकारनि जागायनायखौ बरायनायजों लोगोसे बिटिआर गोरोबथानि माखासे दफाफोरखौ मावफुंनायनि थाखाय दाजानाय कमिसनाव गावबो बाहागोदारि जाफानो मोन्नायाव गोजोन्नाय फोरमायो आरो सरकारनिसिम साबायख'र जासियो। एबसुनि आफादगिरि दिपेन बर'आबो बिटिआर गोरोबथानि दफाफोरखौ मावनो सरकारनि आखाय होजेन्नायखौ गोसो गोर्बोजों बरायनाय फोरमायो।
