गोदान दिल्ली, 27 आगस्ट: भारत सरकारनि मिरु गेलेमु बिफाननि मन्थ्रि किरेन रिजिजुआ फोरमायनाय बायदिब्ला फैगौ 2021 माइथायाव खेल' इन्डिया गेम्सजों लोगोसे ब्रिक्स गेम्सखौबो खुंगोननि थांखि लादों। मंगलबारखालि मिरु गेलेमु बिफाननि मन्थ्रि रिजिजुआ बुङोदि, ब्रिक्स हादतफोर ब्राजिल, रासिया, भारत, चीन आरो खोला आफ्रिकानि गेलेमु बिफाननि मन्थ्रिजों मोनसे गोनांथार जथुमनायनि उनाव बे गेम्सखौ खुंगोननि सायाव मिथिहोदों।
मन्थ्रिया बुंबावोदि, भारत हादतयाव फैगौ बोसोराव मोन 5 हादतनि गेजेराव खुंनो लानाय ब्रिक्स गेम्सखौ भारतआ गाहायै दैदेनगोन। रिजिजुआ बुङोदि, ब्रिक्स गेम्सखौ फैगौ बोसोराव खेल' इन्डियाजों लोगोसे मोनसे समाव आरो मोनसे जायगायावनो खुंफानाय जागोन। बेफोर हादतनि गुबुन गुबुन गेम्सनि गेलेनायाव बाहागो लानायनि फारसे जोंनि हादतनि गेलेगिरिफोराबो खाबु मोन्नो हागोन। बिथाङा बुंबावोदि, बे गेम्सआ हादतनि गेलेगिरिफोरखौ आरोबाव गोख्रोंसिन खालामनो हानायनि मोनसे मोजां खाबु।
फैगौ 2021 माइथायाव भारत सरकारनि गेलेमु बिफानआ खेल' इन्डिया इयुट गेम्स आरो खेल' इन्डिया इउनिभार्सिटि गेम्सखौ खुंनायनि थांखि लादों। फैगौ बोसोराव भारत हादतयाव बेफोर गेम्सखौ खुंफुंनो थाखाय बे समनिफ्रायनो सामलाय आफादआ साखा-फारा जादों। मन्थ्रिया लोगोसेयै मिथिहोबावदोंदि, खेल' इन्डिया इयुटस गेम्सनि खुंनो लानाय समाव ब्रिक्स गेम्सयाव मोन 5 हादतनि सोद्रोमाफोरा बेखेवनाय हाबाफारियाव बाहागो लागोन।
