टुरि, 29 आगस्ट: मोनसे समाव जेब्ला लियनेल मेसिनि मुलुगनां फुटबल फोथाराव साबसिन गेलेगिरि होन्नानै बुबोबाय थानायनि समाव गावखौबो मुलुगनि गोनोसिन फुटबलार महरै सिनायथि होबोदों पटुंगालनि आरो जुभेन्टास क्लाबनि गेलेगिरि क्रिस्टियान रनाल्डआ। रनाल्डआ बुडोदि, जुभेन्टास क्लाबखौ आं मोनफ्रोमबो लीगयावनो सेथि हान्जा आरो सेम्पियन खालामनो सानो। जुभेन्टास क्लाबजों 4 बोसोरसिम गेलेनो गोरोबथा खालामनाय रनाल्डआ बे क्लाबजों थांनाय सिजननि गेलेनायाव गुवारै जाफुसारनो हादों। सशियेल मिडियानि इनस्टाग्रामयाव रनाल्डआ फोरमायनाय बायदिब्ला जुभेन्टासनि गेलेगिरि महरै आंनि 3 थि सिजननि गेलेनाय केरियारनि थाखाय थियारि जादों।
आंनि गेलेनाय गोखोंथिया अरायसम थियारि होननानै फोरमायना बुडोदि, आं आंनि गोनोंथिजों जुभेन्टास क्लाबनि जानानै हान्जानि गेलेगिरिफोरनि मदतयाव गोनों गेलेनो थांखि लादों । 35 बोसोर बैसोनि रनाल्डआ बुङोदि, जुभेन्टासखौ थांनाय मोननै सिजननि सिरि-ए ट्रपि देरहानायाव मदत होनायजों जाफुसारनो हादों। नाथाय हान्जाया थांनाय सिजननि इउफा सेम्पियन्स लीगनि ट्रपिखौ देरहानो हानायनिफ्राय फेलें जादों। गुबुन फारसेथिं दिनैनि सानाव ब्राजिलनि मिजिंथिजानाय गोनों दिफेन्डार टिआग' सिल्बाया सेल्सि क्लाबजों बोसोरसेनि थाखाय गेलेनो गोरोबथा जादों । बेनि सिगां सिल्बाया पेरिस सेन्ट जार्मान क्लाबनि जानानै गेलेबोदोंमोन।
नाथाय बेनि गोरोबथा जानायनि गेलेनाय समा जोबनायनि उनाव गोदान सिजननि थाखाय गुबुन क्लाबजों गेलेनो ब्राजिलनि गेलेगिरिया गोरोबथा जादों । सेल्सि क्लाबआ बुंदोंदि, 35 बोसोर बैसोनि गेलेगिरि टिआग' सिल्बानि गेलेनायजों हान्जानि गेलेनाया गोनोसिन जाबावदों । टिआग' सिल्बाया थांनाय सिजननि सेम्पियन्स लीगयाव पेरिस सेन्ट जार्माननि जानानै फाइनाल मेचखौ गेलेदोंमोन । सेल्सि क्लाबआ बेनि सिगां फैगौ गोदान सिजननि थाखाय इंलेन्ड फुटबल हान्जानि गेलेगिरि बेन सिल्बेल आरो हाकिम जिएसखौ गोरोबथा खालामनानै हान्जायाव लाबोदों।
