कक्राझार, 10 सेप्तेम्बरः हादोरनां गिख्रंथाव करना भायरास साग्लोबनायनि जाहोनाव लकडाउन फोसावनायनि थाखाय गासै फरायसालि, फरायसालिमा आरो सोलोंथाय फसंथानफोरा बन्ध जानानै दंबोयो।
फरायसालिफोरा बन्ध जानानै थानायाव माखासे सोलोंथाय बिथिङाव अनलाइननि गेजेरजों फोरोंथाय होदोंब्लाबो नाथाय फरायसाफोरनि थाखाय लकडाउननि समाव ओरैनो समखौ बारहोनो गोनां जादोंमोन।
बेखिनि समाव गोबां फरायसाफोरा गावबा गावनि रोंगौथि कौसल, आदब आरो सानखांथिजों जुनिया खामानि मावनानै दिन्थिनायखौ नुनो मोनदों। बेनि मोनसे फोरमान महरै बि टि सिनि गाहाय सदर कक्राझारनि सासे फरायसाया लकडाउननि समाव गावनि नाजानायजों इंराजी मिउजिक भिडिअ दिहुनदों।
कक्राझार रुफाथि नोगोरनि ज'ना रानी ब्रह्म आरो दिलिप ब्रह्मनि अनजालु फिसाज्ला रिटिक ब्रह्मआ गावनि नाजानायजों मोगथां महर होनो हादों " किं" मुंनि इंराजी मिउजिक भिडिअखौ।
बे मिउजिक भिडिअखौ बुधबारखालि दिहुनगिरि थामहिनबा फावखुंगुर रिटिक ब्रह्मनि आंगो बिमा ज'ना रानी ब्रह्मआ बेखेवनानै होदों। इंराजी मिउजिक भिडिअ महरै दिहुनजानाय " किं" मिउजिक भिडिअआव फावखुंगुर महरै बाहागो लादों इसा, कुसुम, कुन्डन आरो फ्रानजयमोनहा।
मख’नो गोनांदि इयुनाव सासे माहारीयारी थाखोनि राफोद देंखोगिरि जानायनि थांखि लानाय फावखुंगुर लोगोसे रोजाबगिरि रिटिक ब्रह्मनि बे दिहुनसारनायखौ मैखोमै मदद होदों बिमा ज'ना रानी ब्रह्म आरो बिफा दिलिप ब्रह्मआ।
