कक्राझारनि सानै एडिसिनि देहायाव करना पजिटिभ

कक्राझार, 18 आगस्ट: कक्राझार जिल्लानि जिल्ला बेंगिरि भास्कर फुकनआ फिन खेबसे कक्राझार जिल्ला बेंगिरिनि मावख'खौ बुधबारनिफ्राय गासै सा 5 कन्टेनमेन्ट जन महरै दिनै फोसावनानै होयो। एडिसि देबेश्वर बरा आरो भास्कर दासनि देहायाव कभिड-19 पजिटिभ मोन्नाय लोगो लोगो जिल्ला बेंगिरिआ फिन खेबसे जिल्ला बेंगिरिनि मावख'खौ कन्टेनमेन्ट जन फोसावनो गोनां जायो। फोरमायनाय बादिब्ला सानै एडिसिजों लोगोसे जिल्ला नाडै गासै सा 32 सुबुंनि देहायाव गोदानै करना पजिटिभ मोन्नो हानाय जादों। जायनि थाखाय जिल्ला बॅगिरिनि मावख'याव गासै रोखोमनि मावख'यारि हाबा-हुखाफोरखौ फैगौ रबिबारसिम बन्द फोसावदों। बे गोदानै मोन्नाय बिसानखौ लाना जिल्ला नाडै करना पजिटिभ रोगिनि बिसानआ गासै सा 1,141 सिम जाहैबाय। अदेबानि दिनैसिम गासै सा 845 सुबुंफोरा हामखांनायनि उनाव बोहैथि समसिम सा 246 सुबुंफोरखौ फाहामथाय होबाय थानाय जादों।