सुक्लाइ सेरफां, 14 नभेम्बरः सुक्लाइ सेरफां दख'रा दुलाराय बर' फरायसा आफादनि दैदेन्नायाव दख'रानि सिङाव थानाय भेन्सार गुदि, गेजेर, गोजौ, गोजौसिन आरो फरायसालिमाफोरनि फोरोंगिरिखौ लानानै उदाङै सावरायलायदों। हाबाफारिआव मिरु एबसुनि सोलोंथाय बिफाननि नेहाथारि कास्टम बसुमतारिआ गाहाय आलासि महरै बाहागो लानानै बुङोदि, एबसुआ थांनाय 2011 आरो 2017 इं माइथायनि सोलोंथाय दाफामनाय आइनखौ गनायाखै। बेनिखायनो बिटिआर गोरोबथायाव 6.3 दफाखौ लाबोनाय जादों। जाय दफानि गेजेरजों बिटिआर ओन्सोलनि गासैबो भेन्सार फरायसालि आरो फरायसालिमाफोरा सरकारि खालामजागोन।
बे हाबाफारिआव बाहागो लानाय भेन्सार फरायसालि-फरायसालिमाफोरनि फोरोंगिरिफोरा सोलोंथायनि सायाव गोलाव समनिफ्राय खामानि मावबोनाय आरो बिटिआर गोरोबथायाव 6.3 दफाखौ लाबोनानै फरायसालिफोरखौ सरकारि खालामनो नाजानायनि थाखाय रोजा-रोजा साबायख'र जासियो। 13 नभेम्बरखालि सावराय बे हाबाफारिआव सा 200 नि बांसिन फोरोंगिरिफोरजों लोगोसे मिरु एबसुनिफ्राय रांखान्थि नेहाथारि सरन्जय ब्रह्म, लोगो थुनलाइयारि नेहाथारि सुमित नार्जारि, लोगो सोलोंथाय नेहाथारि अबित नार्जारि, उदालगुरि जिल्ला एबसुनि बारग' बुंथिगिरि, भेरगाव दख'रा एबसुनि आफादगिरिजों लोगोसे सुक्लाइ सेरफां दख'रा एबसुनि मावथिफोराबो बाहागो लादोंमोन।
