उल्थापानी जाथायजों लोब्बा थानाय गासै सा 8 सुबुंफोरखौ खाबाय

कक्राझार, 18 आगस्ट: 2 नं उल्थापानी रेन्जनि रेन्जार हेमेन्त मसाहारिआ फोरमायनाय बादिब्ला समबारखालि उल्थापानीयाव थानाय हाग्रा बिफाननि मावख'याव थाखोसे सुबुंफोरा हरखाबै फैनानै मावख'नि आइजें-आइला, दरजा-खोरखि, गारि- मथरफोरखौ बुफाय-बुसि खालामलांदोंमोन। बेबायदिनो सुबुंफोरनि गाग्लोबनो फैनायखौ नुनानै बिफानारि सुबुंफोरा मावख'निफ्राय खारन्नानैसो जिउ रैखा मोनो होन्नानै मिबथिनाय जादों। बे जाथायनि सायाव गसर थिसन्नायजों लोगोसे उल्थापानी जाथायनि गाहाय बिफाव लागिरि फारियै- बेताल बसुमतारि (19), जारां नार्जारि (26), मनज बसुमतारि (35), बिसिन्त बसुमतारि (33), रन्जित बसुमतारि (36), बिरसेन बसुमतारि (25), रनबिर बसुमतारि (35) आरो रमेश तिरकि (34) मुंनि सुबुंफोरखौ खानाय जायो। मख'नाय बादिब्ला उल्थापानी जाथायजों गासै सा 8 सुबुंफोरखौ पुलिसआ खाबाय। जाथायनि सायाव 143/447/448/353/336/427/379 आइपिसिनि आवथायाव 453/2020 नम्बरनि गसर थिसन्नाय जायो। मख'नाय बादिब्ला समबारखालि सानसुनि 12.30 रिंगासो समाव उल्थापानीयाव थानाय हाग्रा बिफाननि मावख'याव मोनसे बुरजा सानखोनि सुबुंफोरनि दोलोया हाग्रा बिफाननि मावख'याव गाग्लोबफैदोंमोन जाथायखौ लानानै गोथौ जिंगा सिनाय फोरमायदों मन्थ्रि प्रमिला रानी ब्रह्मआ। बे जाथायखौ रेन्जारनि खुगानिफ्राय मिबथिनो मोनबायब्लाबो थार जाथायनि सायाव साबसिनै मिबथिनो राइजो-राजाफोरजों सावरायोब्ला आरोबाव रोखासिन जागोन होन्नानै मख'यो। अदेबानि जाथायखौ लानानै जिंगा सिनाय फोरमायदों मुस्रिमा ब्रह्मआ।