अनलाइन डेक्स, 26 सेप्तेम्बर: स्पेइननि मुंदांखा टेनिस गेलेगिरि राफेल नाडालआ फैगौ रबिबारनिफ्राय जागायनो गोनां ग्रेन्डस्लेम टुर्नामेन्ट फ्रेन्स अपेनआव हौवाफोरनि हार्सि बादायलायनायाव गावनि बादायनायखौ बुल्गारियानि गेलेगिरि इगर गेर'सिमबनि हेंथायै जागायगोन । गावनि केरियारआव 13 थि खेब फ्रेन्स अपेनआव गेलेनो साखा-फारा जानाय नाडालआ बे खेबनि टुर्नामेन्टआव फाइनालसिम सौहैनांगौआ गोर्ले जानाय नङा। मानोना बे खेबनि टुर्नामेन्टआव माखासे गोख्रों गेलेगिरिफोरजों नाडालआ मोगा-मोगि जोनांगोन। एरैहाय इगरआ इउएस अपेननि जोबथा 8 थामहिनबा क्वार्टार फाइनालसिम सौहैनानै आलेक्जेन्डार ज्वेरेबजों जेन्नांदोंमोन ।
बेयावबो इगरआ ज्वेरेबखौ गोर्लेयै देरहाहोयाखै। बबेखानि नाडालआ जुदि सेमिफाइनालसिम सौहैनो हायोब्ला इउएल अपेन सेम्पियन डमिनिक थिएमजों बादायनांनो हागौ । बेराफार्से मुलुगनि नम्बर 1 टेनिस गेलेगिरि सार्बियानि नभाक जकभिचआबो फ्रान्स अपेन टुर्नामेन्टआव गावनि गिबि मेचखौ सुइडेननि मिकाइल यमरनि हेंथायै गेलेजेनगोन। बेनि अनगायैबो बारग' सेम्पियन स्टेन वावरिंका आरो ब्रिटेननि गेलेगिरि एनडि मरेनि गेजेराव गिबि मेचखौ गेलेजेनगोन । गुबुन सासे टेनिस स्टार रजार फेडेरारआ बे टुर्नामेन्टआव गेलेनाय नङा। बेराफार्से आइजोफोरनि हार्सिं बादायलायनायाव आमेरिकानि सेरिना उइलियाम्सआ गिबि मेचखौ हादरनिनो क्रिस्टिआहननि हेथायै गेलेजेनगोन।
