बिजनी, 25 आगस्टः दिनै आबाद फोथारनि एम्फौ जानायनिफ्राय उदां हास्थायनानै अबंलाउरिनि खाथियाव हान्थु खरायनो गोनां जादों आबादारिफोरा । बेबायदिनो फुजा, नाम किर्टन आरो आर'ज गाबनानै खस्थ' खालामनानै मावनाय आबादनि रैखाथि नागिरनानै आबादारिफोरा बिमा माइनावनि खाथियाव आर'ज गाबो।
सरकारि आबाद बिफान थासेयावबो बिफानारि मन्थ्रि अतुल बरानि लेहेमथि आखुथाय आरो सिबिथायखौ नेनानै थायालासै आबादारिफोरा बिमा माइनावनि खाथियाव साफिनानै गाइनाय आबाद फसलनि रैखाथि बियो। आबादारिफोरा अजद होनाय बायदिब्ला आबाद बिफाननो खौरां होसेयावबो जेबो राहा लायैनि जाहोनावनो बे राहाखौ लानो गोनां जादों।
आबादारिफोरा 1 रोजा माइ दुब्लियाव 3 लिटारल' एम्फौ बुथारग्रा मुलि जगायनानै होनायनि अजद सिखारदों। मख'नाय बायदिब्ला बिजनी हालामनि 1 नं पागुना गामियाव थानाय गं 85 नख'रनि गासै 320 बिघा हानि गेजेराव 50 जौखोन्दो हानि मायखौ एम्फौफोरा गाग्लोबनानै फोजोबस्रांबाय।
